యువరాణి గారి ఏడు చేపలు ఏడుస్తుంటే WALMART కి పంపారు

మీరు చిన్నప్పుడు "అనగనగా ఒక రాజు. ఆ రాజుకి ఏడుగురు కొడుకులు. వాళ్ళు వేట కెళ్ళి ఏడు చేపలు తెచ్చారు." అన్న కధ విన్నారు కదా! ఇదీ అలాంటిదే, కాకపోతే ఇక్కడ రాజు గారికి ఒక కూతురు. ఆ తర్వాత కధ రాజు గారి చెప్పింది చదవండి.

మా అమ్మాయి నాకు పెంచుకోడానికి ఏదో ఒక పెట్ కావాలి, అని ఎప్పుడూ అడుగుతూ వుంటుంది. కుక్కనో, పిల్లినో పెంచే స్తోమత, ఓపిక మనకి లేవు. ఒక వేళ కూతురు మీద ప్రేమ కొద్దీ రెండూ తెచ్చుకుని కొన్నాసరే, మనం వూరు వదిలి వెళ్ళేటప్పుడు దాని బాధ్యత ఎవరో ఒకరికి అప్పచెప్పాలి.   మనం సెలవ దొరికితే రోడ్డెక్కి తిరిగే టైపు. ఇలా లాభం లేదని దీనికి ఈ సారి పుట్టిన రోజుకి ఏదో ఒకటి కొనాలి అని చెప్పి బాగా ఆలోచించి చేపల మీద డిసైడ్ అయ్యాను.
  ఇంతలో నా causin ఇంటి కొచ్చినప్పుడు, "అన్నయ్యా! దాని కోసం ఏదైనా కొంటాను. ఏం కొనాలో చెప్పు" అని అడుగుతుంటే ఒక ఆలోచన ఒచ్చింది. "నేను aquarium కొంటాను, నువ్వు చేపలు కొను" అని చెప్పాను. సరే అని ఇద్దరం నా కూతురు పడుకున్నాక WALMART కి బయలుదేరాం. అసలు చేపలు గురించి నాకు ఏమి తెలీదు, నాతో పాటూ వున్న causin కి నాకంటే తక్కువ తెలుసు. ఇంటి దగ్గర నేను కొంచం GOOGLE చేసి సమాచారం సంపాదించాను. ఈ విషయం వాడికి తెలియదు కాబట్టి నేను కొంచం కొంచం చెపుతుంటే వాడు నాకేసి గొప్పగా చూస్తున్నాడు. మనం కూడా "మరి చేపల పెంపకం అంటే మాటలా?" అని చేపల చెరువు మేనేజ్ చేసే వాడి రేంజ్ లో బిల్డ్ అప్ ఇచ్చాను.
   అక్కడకి వెళ్ళాక అర్ధం అయ్యింది, మనకి తెలిసుంది గోరంత -తెలియంది కొండంత అని. అక్కడ పని చేసే వాడి కోసం కబురెట్టి మరీ ఒకడిని పట్టుకున్నాము. వాడొక అయోమయం జగన్నాధం. వాడి అరా కొరా జ్ఞానం తో మా చేత ఒక AQUARIUM  తో పాటు వాడు ఏడు చేపలు, ఒక నత్త, దాని ఆహారం, ఒక వల గరిటె, కొన్ని రాళ్ళు కొనిపించాడు. రంగులు బావున్నై కదా అని ఏ చేప పడితే ఆ చేప తీసుకో కూడదండోయ్. చేపలలో కూడా కొన్ని గుంపులుగా మాత్రమే బతుకుతాయని, కొన్ని వేరే చేపలని తినేస్తాయని, కొన్ని నాచు తిని బతికేస్తాయని నాకు అప్పుడే తెలిసింది. పైగా చేప రకాన్ని బట్టి AQUARIUM ఉష్ణోగ్రత ఎంత ఉండాలో కూడా రాసారు. చేపలని ఒక ప్లాస్టిక్ కవర్ లో నీళ్లల్లో పెట్టి ఇచ్చి, ఇది ఎక్కువ సేపు ఇలా బతకదు అని చెప్పి మరీ కవర్ కి ముడేసాడు మా అయోమయం జగన్నాధం. చేపల గురించి ఇన్ని విషయాలు తెలుసుకున్నాక మా కళ్ళు పత్తి కాయల్లా పటేల్ మని విచ్చుకున్నై. అలా విచ్చుకున్న కళ్ళతో ఇంటికొచ్చి, రాత్రి పన్నెండు ఐనా నిద్ర ఆపుకుని, చేపలు చచ్చిపోతాయని టెన్షన్ తో అప్పటికప్పుడు ఫిక్స్ చేసాము.
 పొద్దున్న లేచి aquarium చూసిన యువరాణి (నా కూతురు) కళ్ళల్లో ఆనందము చూసి, కష్టానికి ఫలితం దక్కిందని అనిపించింది. One week ok, second week started trouble. ఆ చేపలలో ఒక చేప చచ్చిపోయింది. దాన్ని చూసి నా కూతురు ఎందుకు అలా ఐపోయింది అని అడగడం మొదలు పెట్టింది. దానికి తెలియకుండా ఒక రాత్రి చేపని తీసేసి, అప్పటికప్పుడు WALMART కి వెళ్లి ఇంకోటి పట్టుకొచ్చా. కొంచెం రంగు తేడా వున్నా, దానికి పెద్ద తెలియలేదు. తరవాత నాలుగు రోజులకి, రెండు చేపలు చచ్చిపోయాయి. ఈ సారి మళ్ళీ WALMART కెళ్తే ఆ చేపలు స్టాక్ లేవు. రెండు మూడు చోట్ల వెదికినా దొరకలేదు. అప్పటికి దానికి పూర్తిగా అంకెలు తెలీదు కాబట్టి లోపల దాక్కునాయని చెప్పి మేనేజ్ చేశా. ఇంతలో కొన్ని చిన్న చేపలు కనిపించాయి aquarium లో. అందంగా ముద్దుగా వున్న ఆ చేపలు చూసి మేము మురిసిపోతుంటే అవన్నీ రెండు రోజులకే మాయం ఐపోయాయి. ఒక్క చేప తప్ప మిగిలిన చేపలు వారానికి మించి బతకట్లేదు. రెండు మూడు సార్లు చేపలు WALMART నించి తెచ్చాక, ఇక లాభం లేదని చేపల జాతులు రాసుకొచ్చి గూగుల్ చేశా.  పరిశోధన చేసాక తెలిసింది మిగులుతున్న చేప అన్నిటినీ చంపేస్తోందని.

ఇలా చేస్తే చేపలకి నా pay చెక్ సరిపోదని అర్ధం అయ్యి ఒక ఐడియా వేసా. మరీ చిన్నపిల్లకి చేప చావు గురించి చెప్పడం ఎందుకని, మన చేపలు వాళ్ళ ఫ్యామిలీ మీద బెంగ పెట్టుకునాయని WALMART లో దిన్చేసానని చెప్పా. ఆ తర్వాత WALMART కి వెళ్ళిన ప్రతీ సారి దాని చేపలని పలకరిస్తుంది. అదండీ మా చేపల కధ. మీరు ఎప్పుడైనా WALMART కి వెళ్తే చూడండి మా ఏడు చేపలు ఇంకా అక్కడే వున్నాయి. నత్త మటుకు ఇంకా అలాగే ఉంది. Aquarium దాని కోసమే కొన్నట్లు.
రెండు వారాల తరవాత నా కూతురు ఇంటి కొచ్చి "నాన్న మా డే కేర్ లో చేప చచ్చిపోయింది ఇవ్వాళ" అని చెప్పింది. గతుక్కుమని నేను, "మరి మీరు ఏం చేసారు" అని అడిగాను. "గొయ్యి తవ్వి, పాతి పెట్టి, PRAY చేసాము" అని చెప్పింది. అప్పుడు మహారాణి వారు రాజు గారి కేసి చూసిన చూపులకి  అర్ధం వెతికితే -"ఈ మాత్రం దానికి ఇన్ని డబ్బులు దూల తీర్చాడు, ముందు వీడిని గొయ్యి తీసి పాతెయ్యాలి" అని బ్యాక్ గ్రౌండ్ లో డైలాగ్ వినిపించింది.