నీకు తెలుసా ప్రేమంటే?

ప్రేమంటే ఏంటో నాకు తెలియదన్నావు...
అసలు నాకు ప్రేమించడం చేతకాదన్నావు

నీకు తెలుసా ప్రేమంటే ఏమిటో..?
ఇన్నాళ్ళ మన సాన్నిహిత్యంలో

నీకేం కావాలో ఎప్పుడూ అడిగే నువ్వు
నన్ను ఎప్పుడైనా ఏం కావాలో అడిగావా?

నీ ఇష్టాల గురించి నాకెప్పుడూ గుర్తు చేస్తూ
నాకూ ఇష్టం ఉంటుందని తెలుసుకో  లేక పోయావు

నీ చేరువలో నేనున్నప్పుడు
నేను  నీకిచ్చిన స్వేచ్ఛ
నీకు దూరంగా వున్నా సరే
నాకు లేకుండా చేస్తున్నావు

నావన్నీ నీవేనని లాక్కునే నువ్వు
నీవన్నీ రహస్యంగా దాచుకున్నావు

నీ ప్రపంచాన్ని నా మీద రుద్దే నువ్వు
నా ప్రపంచాన్నించి నన్ను దూరం చేస్తున్నావు

నా చుట్టూ వుంటే నీకు సంతోషం అంటూ
నా చెంతకొచ్చి నీ విషాదాన్ని చల్లుతావు

నీ  చుట్టూ ఈ వెలుగెక్కడిదని
నా ఏకాంతాన్ని భగ్నం చేసి

నా చిరునవ్వుల దీపాలని ఆర్పేసి
చీకట్లో నన్నొదిలి నీ దారినపోతావు

అవసరాలకోసం అనుబంధాలని  ఆశ్రయించే నువ్వు
నిజాలని భరించలేక నింద లని సంధిస్తావు

నీ బాధ్యతా రాహిత్యానికి, నిర్లక్ష్యానికి
నన్ను బలిపశువుని చేస్తుంటావు

నా నిస్వార్ధంలో కూడా నీ స్వార్ధమే వెతుక్కునే  నువ్వు
నా ప్రేమ విలువ ఎప్పటికీ తెలుసుకోలేవు

నీలా నేను నిన్ను నిలదియ్యకున్నా
నీ పై జాలిపడే నా మనసు  అడుగుతోంది

అసలు .......

నీకు తెలుసా ప్రేమంటే?