ఏ చోట వున్నా నీ వెంట లేనా

       ఎందుకో చాలా సార్లు ఈ పాట గుర్తుకొస్తూ వుంటుంది. ఒక మనిషి మనతో లేనప్పుడు ఆ మనిషిని మనం ఎంత ఎక్కువ గుర్తు చేసుకుంటే మనం అంత మిస్ అవుతున్నట్లు - ముఖ్యంగా మనం కష్టంలోనో, బాధలోనో వున్నప్పుడు. ఆకలేసినప్పుడు అమ్మ గుర్తుకొస్తుంది, అమ్మ చేతి వంట గుర్తుకొస్తుంది.  డబ్బు అవసరం వున్నప్పుడు నాన్న, అనారోగ్యం అప్పుడు మనని చూసుకునే అమ్మో, అక్కో, అమ్మమ్మో, సహాయం కావాలంటే స్నేహితులు బాగా గుర్తుకు వొస్తారు. ముఖ్యంగా అందరికీ దూరంగా బతికే వాళ్లకి అయిన వాళ్ళు, ఆప్తులు గుర్తుకు వొచ్చే సందర్భాలు అన్నీకష్టాలో, బాధలో, అవసరాలో, ఒంటరితనమో అయ్యుంటాయి.

  Lion King సినిమా లో సింబా అనే చిన్న సింహంతో వాళ్ళ నాన్నముఫాసా, ఆకాశం చూపించి "మా నాన్న నాకు చిన్నప్పుడు చెప్పిన సంగతి నీకు చెప్పాలనుకుంటున్నాను. ఆకాశంలో (చుక్కలు చూపిస్తూ) చూడు, మన పూర్వీకులు అక్కడ నించి మనల్ని చూస్తూ వుంటారు. నువ్వు ఒంటరి నని అనిపించినప్పుడు, ఆకాశంకేసి చూస్తే నీకు మార్గం  చూపించడానికి వాళ్ళు తోడుగా వుంటారు - నాతో పాటుగా".
  నువ్వే నువ్వే సినిమాలో వున్న ఈ పాట మా గురువు గారు (సిరివెన్నెల గారిని నేను అభిమానంగా అలా సంభోదిస్తాను) రాసినది. దానికి తోడు చిత్ర గొంతులో అమృతధారలా అనిపిస్తుంది ఈ పాట నా చెవులకి. అలాంటి ఫీలింగ్స్ పాటలలో కురిపించడంలో నెంబర్ 1 ఆయన. పల్లవిలో "ఏ చోట వున్నా నీ వెంట లేనా" అని తన పరిస్థితిని చెప్తూ, చరణంలో తన తండ్రిని తనకు స్వతంత్రంగా ఎంచుకునే హక్కునిమ్మని ఒక అమ్మాయి తన తండ్రిని  అర్ధిస్తున్నట్లుగా వుంటుంది.

ఏ చోట వున్నా నీ వెంట లేనా
సముద్రమంతా నా కన్నుల్లో కన్నీటి ఆలలౌతుంటే
ఎడారి అంతా నా గుండెల్లో నిట్టూర్పు సెగలవుతుంటే
రేపు లేని చూపు నేనై శ్వాస లేని ఆశ నేనై మిగలనా
నువ్వే నువ్వే కావాలంటుంది పదేపదే నా ప్రాణం
నిన్నే నిన్నే వెంటాడుతూ ఉంది ప్రతీక్షణం నా మౌనం
ఏ చోట వున్నా నీ వెంట లేనా
సముద్రమంతా నా కన్నుల్లో కన్నీటి ఆలలౌతుంటే

ఎడారి అంతా నా గుండెల్లో నిట్టూర్పు సెగలవుతుంటే

నేల వైపు చూసే నేరం చేశావని
నీలి మబ్బు నిందిస్తుందా వాన చినుకుని
గాలి వెంట వెళ్లే మారం మానుకోమని
తల్లి తీగ బంధిస్తుందా మల్లె పూవుని
ఏమంత పాపం ప్రేమ ప్రేమించడం
ఇకనైన చాలించమ్మ వేధించడం
చెలిమై కురిసే సిరివెన్నెలవా క్షణమై కరిగే కలవా

నువ్వే నువ్వే కావాలంటుంది పదేపదే నా ప్రాణం ||
వేలు పట్టి  నడిపిస్తుంటే చంటి పాపలా
నా అడుగులు అడిగే తీరం చేరేదెలా
వేరెవరో చూపిస్తుంటే నా ప్రతి కలా
కంటి పాపం కోరే స్వప్నం చూసేదెలా
నాక్కూడ చోటేలేని నా మనసులో
నిన్నుంచగలనా ప్రేమా ఈ జన్మలో
వెతికే మజిలి దొరికే వరకు
నడిపే వెలుగై రావా
నువ్వే నువ్వే కావాలంటుంది పదేపదే నా ప్రాణం
నిన్నే నిన్నే వెంటాడుతూ ఉంది ప్రతీక్షణం నా మౌనం

ఏ చోట వున్నా నీ వెంట లేనా
సముద్రమంతా నా కన్నుల్లో కన్నీటి ఆలలౌతుంటే
ఎడారి అంతా నా గుండెల్లో నిట్టూర్పు సెగలవుతుంటే